Trano bongo

Ramaroson Wilson

Trano bongo

Trano bongo tafo herana
Varavarana zozoro
Mora rava sy miserana
Vetivety toa hikoro

Trano bongo tokan’efitra
Mihafihafy teritery
Toa voabaiko mba handefitra
Sy hitoetra manirery

Ny vovonana efa koka
Nokikisan’ny fotoana
Tafontrano feno loaka
Ravarava mihafoana

Ny fanaka miharihary
Ratsiratsy bangabanga
Satro-tandroka antsim-bary
Tsangambava tanimanga

Akalana eo an-jorotrano
Hany sisa hanampy izany
Fitantaran’i dada angano
tantara kalo fahizany

Trano bongo tafo herana
Varavarana zozoro
Mora rava sy miserana
Vetivety toa hikoro

Trano bongo tokan’efitra
Mihafihafy teritery
Toa voabaiko mba handefitra
Sy hitoetra manirery