Eto an-dalana
Lova miampita
Eto an-dalana
- Lohasahan-dranomaso no vakiako
Maizimaizina sady mideza
Koa tantano ry Ray zany diako
Efa mila hitofezafeza
Feno tsilotsilo, be karaobato, saro-dalana
Nefa hazavana mitsilopy no tazana
Toa tsy hitako ny indray mandingana avy amiko
Kivikivy sy matahotra aho mijery ny hoaviko
Refrain : Sandrinao no iriko hitantana ny dia
Eto andalam-pihoarana ho any Aminao
Ka handroso tsy amin-tahotra aho fa satria
Lohalalako Hianao Jeso
- Bibidia izay lian-drà indry miandry
Kihon-dalana no hiereny
Efa vizana be ity zandry
Mitalaho Aminao ombieny
Hery tsy mitovy indro mifanena ary fantatra
Ny nofo malemy no tsy maintsy ho maratra
Tsisy intsony ala olana azo hiodivirana
Raha tsy eo Hianao Jeso hanala izay manahirana
Refrain : Sandrinao no iriko hitantana ny dia
Eto andalam-pihoarana ho any Aminao
Ka handroso tsy amin-tahotra aho fa satria
Lohalalako Hianao Jeso
- Kely sisa dia ho vita re ny dia
Nefa maika mahery ny ady
Ka hilofika ve ? Sanatria !
Ny manaiky ho resy dia fady
Mila hery miha-mitombo isan’andro avy Aminao
Ry Jesosy Tompo Zoky tia izay tsy mandao
Eo no hitako azo antoka sy tsara indrindra izao
Eo aho hijoro sy handresy mba ho voninahitrao
Refrain : Sandrinao no iriko hitantana ny dia
Eto andalam-pihoarana ho any Aminao
Ka handroso tsy amin-tahotra aho fa satria
Lohalalako Hianao Jeso